ஜனாதிபதி மஹிந்த ராஜபக்ஷ உட்பட முன்னாள் ஜனாதிபதிகளின் சலுகைகளைக் குறைப்பதாக
தேசிய சக்தி அரசாங்கம் வெளியிட்ட அறிக்கைகள் மற்றும் சமீபத்தில் இந்த விஷயத்தில் ஜனாதிபதி அனுரகுமார திசாநாயக்கவின் வலுவான அறிக்கை காரணமாக, மிகவும் தீவிரமான தொனியைப் பெற்றுள்ளன.
ஓய்வுபெற்ற ஜனாதிபதிகள் மற்றும் பாராளுமன்ற உறுப்பினர்கள், ஆட்சிக்கு வந்த பிறகு அனுபவித்து வந்த சலுகைகளைக் குறைக்க நடவடிக்கை எடுப்பதாக, தேசிய மக்கள் சக்தி, கடந்த ஜனாதிபதித் தேர்தலின் போதும் பொதுத் தேர்தலின் போதும் மக்களுக்கு வாக்குறுதி அளித்திருந்தது.
தேசிய மக்கள் சக்தியின் தலைவரான அனுரகுமார திசாநாயக்க ஜனாதிபதியாக தேர்ந்தெடுக்கப்பட்ட பின்னர், அந்த சலுகைகளைக் குறைப்பதற்கான பொருத்தமான முன்மொழிவு, அமைச்சரவையில் சமர்ப்பிக்கப்பட்டது.
அதன்படி, இந்தச் சலுகைகளைக் குறைப்பதற்கு எடுக்க வேண்டிய சட்ட நடவடிக்கைகளைத் தீர்மானிக்க ஜனாதிபதி அனுரகுமார திசாநாயக்க தலைமையிலான அமைச்சரவையால் ஒரு குழு நியமிக்கப்பட்டது.
இருப்பினும், முன்னாள் ஜனாதிபதிகளின் சலுகைகளைக் குறைப்பதற்கான நடவடிக்கை எடுப்பதாயின், அதற்கு தற்போதுள்ள ஜனாதிபதி உரிமைகள் சட்டத்தில் திருத்தம் செய்யப்பட வேண்டும் என்று சட்ட வல்லுநர்கள் சுட்டிக்காட்டுகின்றனர். அவை தற்போது வார்த்தைப் போருக்கு மட்டுப்படுத்தப்பட்டுள்ளன.
ஜனாதிபதியின் உரை…
“ஒரு ஜனாதிபதியின் பாதுகாப்புக்காக, ஆண்டுக்கு 700 மில்லியன் செலவிடப்பட்டது. ஆயிரக்கணக்கான பொலிஸார், ராணுவம், சிறப்புப் படையினர் என அனைத்தும் அகற்றப்பட்டன, அறுபதாகக் குறைக்கப்பட்டது. நீங்கள் இன்னும் புலம்பினால், அந்த அறுபதையும் நீக்கிவிடுவேன். அறுபது பேரை வைத்திருக்கும் கனவான்களே, புலம்பிக்கொண்டிருந்தால் அதையும் நீக்கிவிடுவேன். புகார் செய்தால் என்ன நடக்கும் என்று நான் உங்களுக்குச் சொல்கிறேன். நாங்கள் எந்த அமைச்சருக்கும் அரச வீடுகளை வழங்குவதில்லை. முன்னாள் ஜனாதிபதிகளுக்கு வீடுகள் வழங்கப்படுவதில்லை. நான் இப்போது ஒரு கடிதம் எழுதிக் கொண்டிருக்கிறேன், எனக்கு வீடு வேண்டாம் என்று. ஆனால், மற்றவர்கள் அவ்வாறு கொடுக்க மாட்டார்கள்.
“நான் மஹிந்தவின் வீட்டை மதிப்பீடு செய்ய அனுப்பினேன். அதன் மதிப்பு எவ்வளவு தெரியுமா? அதன் நிலம் இன்னும் மதிப்பிடப்படவில்லை. வீடு மட்டும் மதிப்பிடப்பட்டது. அந்த மதிப்பீட்டின்படி, மாத வாடகை 46 லட்சம் ரூபாயாகும். பௌத்தலோக மாவத்தையில் உள்ள வீட்டை நாம் மீளப்பெறுவோம். சம்பளத்தில் மூன்றில் ஒரு பங்கைக் கொடுப்போம். அல்லது மீதமுள்ள பணத்தைக் கொடுத்து அந்த வீட்டிலேயே தங்கலாம். வாடகை செலுத்தவில்லை என்றால், அதை வெளியே செய்யவேண்டும். இந்த நாட்டைக் கட்டியெழுப்ப வேண்டும். அவர்கள் நாட்டு மக்களை ஏமாற்றி, பொதுமக்களின் செல்வத்தை பெருமையுடன் அனுபவித்து வருகின்றனர்” என்றார் அநுர.
மஹிந்த ராஜபக்ஷ தனது உத்தியோகபூர்வ இல்லத்தை ஒப்படைக்கத் தயாரா?
அரசாங்கம் கோரும் எந்த நேரத்திலும், முன்னாள் ஜனாதிபதி மஹிந்த ராஜபக்ஷவின் உத்தியோகபூர்வ இல்லத்தை ஒப்படைக்கத் தயாராக இருப்பதாக, பாராளுமன்ற உறுப்பினர் நாமல் ராஜபக்ஷ தெரிவித்தார்.
ஊடகங்களுக்கு கருத்து தெரிவித்த அவர், சம்பந்தப்பட்ட உத்தியோகபூர்வ இல்லம் அரசியலமைப்பு ரீதியாக முன்னாள் ஜனாதிபதிக்கு சொந்தமானது என்றும் அதற்கான எழுத்துப்பூர்வ அறிவிப்பு வெளியிடப்பட்டால், அந்த இல்லத்தை அரசாங்கத்திடம் ஒப்படைக்கத் தயாராக இருப்பதாகவும் கூறினார்.
“மஹிந்த ராஜபக்ஷ கொழும்பில் வசிக்கும் அந்த வீடு, அரசியலமைப்பின் மூலம் முன்னாள் ஜனாதிபதிகளுக்கு வழங்கப்பட்டது. இது, குறிப்பாக பாதுகாப்பை மையமாகக் கொண்ட ஒரு கேள்வி. ஆனால், தற்போதைய ஜனாதிபதி அந்த வீட்டை யாருக்காவது விற்க விரும்பினால், அவர் முன்னாள் ஜனாதிபதி மஹிந்த ராஜபக்ஷவை அங்கிருந்து அகற்ற வேண்டும். ஜனாதிபதி அதை எழுத்துப்பூர்வமாக அறிவிக்க முடியும். இது, நாங்கள் கேட்டு வாங்கிய வீடு அல்ல. அரசியலமைப்புச் சட்டத்தின்படி முன்னாள் ஜனாதிபதி ஒருவர் பெறும் வீடு.
கேள்வி: திடீரென்று உங்களை உத்தியோகபூர்வ இல்லத்திலிருந்து வெளியேறச் சொன்னால் என்ன செய்வீர்கள்?
“நாங்கள் எப்போது வேண்டுமானாலும் வெளியேறுவும். ஏனென்றால், இவை எங்கள் வீடுகள் அல்ல, இவை அரசாங்க வீடுகள். ஜனாதிபதி இதை யாருக்காவது விற்க விரும்பினால், நாங்கள் செல்வோம். அது ஒரு பிரச்சனையல்ல.”
கேள்வி: இந்த விஷயத்தில் ஜனாதிபதி மஹிந்த ராஜபக்ஷவின் கருத்து என்ன?
“அவரும் அந்தக் கருத்தில்தான் இருக்கிறார்.
கேள்வி: நீங்கள் எந்த நேரத்திலும் செல்லத் தயாராக இருக்கிறீர்களா?
“நிச்சயமாக. அவர் மஹிந்த ராஜபக்ஷ. பலரும் அதை மறந்துவிட்டார்கள்” என்று நாமல் கூறுகிறார்.
'அரசு அதிகாரிகளுக்கு வழங்கப்படும் வீடுகள் குறித்து எந்த முடிவும் எடுக்கப்படவில்லை'
பாதுகாப்புப் படையினர் அல்லது அரச அதிகாரிகளின் வீடுகள் தொடர்பாக இதுபோன்ற எந்த முடிவும் எடுக்கப்படவில்லை என்று, சுகாதார மற்றும் வெகுஜன ஊடக அமைச்சர் டாக்டர் நளிந்த ஜயதிஸ்ஸ தெரிவித்தார்.
இது ஓய்வு பெற்ற ஜனாதிபதிகளுக்கு மட்டுமே பொருந்தும் என்றும் அவர் கூறினார்.
இந்தச் சலுகைகளை எவ்வாறு குறைக்க முடியும்?
முன்னதாக பிபிசி சிங்கள சேவையிடம் பேசிய முன்னாள் சேிரேஷ்ட மேலதிக சொலிசிட்டர் ஜெனரல் பிரியந்த நவான, இந்தச் சலுகைகளை எவ்வாறு குறைக்க முடியும் என்பதை விளக்கியிருந்தார்.
"இந்தச் சலுகைகள் பாராளுமன்றத்தால் நிறைவேற்றப்பட்ட மசோதா மூலம் தங்கள் பதவிக் காலத்தை நிறைவு செய்த ஜனாதிபதிகளுக்கு வழங்கப்பட்டுள்ளன. அதன்படி, சட்டத்தில் திருத்தங்கள் மூலம் மட்டுமே சலுகைகளை அதிகரிக்கவோ, அல்லது குறைக்கவோ முடியும். கூடுதலாக, சட்டத்தை ரத்து செய்வதற்கான வாய்ப்பும் உள்ளது. அந்தச் சலுகைகள் குறைக்கப்பட வேண்டுமானால், ஜனாதிபதியினால் ஓய்வுபெற்ற உயர் நீதிமன்ற நீதிபதி கே.டி. சித்ரசிறி தலைமையில் ஒரு குழு நியமிக்கப்பட்டுள்ளது. இந்தக் குழு, இந்த விஷயத்தை ஆய்வு செய்து, தொடர்புடைய திருத்தங்களை எவ்வாறு செய்வது என்பது குறித்த பரிந்துரைகளை வழங்க திட்டமிட்டுள்ளது.
“அத்தகைய திருத்தத்தை பாராளுமன்றத்தில் எளிய பெரும்பான்மை வாக்குகளால் நிறைவேற்ற முடியும் என்று நான் நம்புகிறேன். இருப்பினும், சட்டத்தில் அத்தகைய திருத்தத்தைச் செய்வதற்கு முன், அரசாங்கம் ஒரு பொருத்தமான வரைவு மசோதாவை நாடாளுமன்றத்தில் சமர்ப்பிக்க வேண்டும்.
“சட்டமூலம் அறிமுகப்படுத்தப்பட்ட பிறகு, குடிமக்களும் பாதிக்கப்பட்ட தரப்பினரும், அதன் சட்டபூர்வமான தன்மையை எதிர்த்து உயர் நீதிமன்றத்தில் மனுக்களை தாக்கல் செய்ய அரசியலமைப்பு உரிமையைப் பெற்றுள்ளனர். இந்த முறையில் மனுக்கள் சமர்ப்பிக்கப்படும் போது, தொடர்புடைய சட்டமூலத்தின் அரசியலமைப்புச் சட்டத்திற்கு உட்பட்டதா என்பதை ஆராய்ந்து, ஒரு முடிவை முன்வைக்க உயர் நீதிமன்றத்திற்கு அதிகாரம் உள்ளது.
“அப்படிப்பட்ட நிலையில், தொடர்புடைய சட்டமூலத்தை பாராளுமன்றத்தில் எளிய பெரும்பான்மை வாக்குகளால் நிறைவேற்ற முடியுமா? இல்லையென்றால், அதற்காக சிறப்பு பெரும்பான்மை வாக்குகளைப் பெற வேண்டுமா? "உயர் நீதிமன்றம் அளித்த முடிவின் அடிப்படையில் தொடர்புடைய சட்டமூலத்தை நிறைவேற்ற முடியும்" என்று, முன்னாள் சொலிசிட்டர் ஜெனரல் பிரியந்த நவானா, பிபிசி சிங்களத்திடம் முன்பு தெரிவித்திருந்தார்.
